sexta-feira, 23 de janeiro de 2009

Entrevista con Rudolf Höss


Por Luciano Álvarez

8 de abril 1946, León Goldenshon, un médico psiquiatra norteamericano, entrou a un dos cuartos do pavillón C da prisión de Nuremberg. Agardáballe un home de 46 anos, pelo escuro, ningún sinal particular. Non obstante a súa manifesta educación, recibiuno sentado, cos dous pés dentro dunha tina de auga fría.
-"Tiven unhas queimaduras como consecuencia de que os británicos, cando me capturaron me atoparon medio espido e o único que fixeron foi botarme unha manta enriba e levarme ao cárcere; non me deron calcetíns nin zapatos", foron as súas primeiras palabras, a modo de explicación e queixa.
-Ter os pés en auga fría aliviame a dor, concluíu
O home que así se manifesta chámase Rudolf Höss.
-Cal era o seu cargo oficial?, pregúntalle o Dr. Goldenshon
-Eu fun comandante en xefe de Auschwitz-Birkenau, durante catro anos.
-Cantas persoas foron executadas en Auschwitz durante ese tempo?
-O número exacto é difícil determinalo. Eu calculo que arredor dun millón e medio de xudeus.
-E iso que lle parece?
Rudolf Höss non contesta. Leon Goldenshon repite a pregunta.
-Eu recibía ordes persoais de Himmler, responde impávido e indiferente, cos seus pés na tina, mentres se frota as mans para entrar en calor. Rudolf Höss nacera en 1900 en Baden-Baden, dunha familia católica, aínda que tempranamente o mozo Rudolf abandonou a fe da súa familia, coa que -por outra parte- pronto rompería todo vínculo. Estudante mediocre, a Primeira Guerra Mundial foi, como para moitos outros aventureiros, unha oportunidade. Apenas cumpridos os 15 anos alistouse voluntario, na fronte turco. Cando terminou a guerra, o agora sarxento de infantería desocupado Rudolf Höss, mantívose fiel ao oficio da violencia e converteuse ao nacionalsocialismo. En 1923 foi condenado a dez anos, con traballos forzados, polo asasinato do dirixente comunista Walter Kadow. Pero só cumpriu cinco. Durante este encarceramento Höss converteuse en experto coñecedor da psicoloxía dos presos. Desta experiencia veulle a idea demaquillar as cámaras de gas como duchas para que o asasinato se produza sen rebelión por parte dos condenados. En 1934 descubriu un oficio para o que estaba particularmente dotado: a administración de campos de concentración. Comezou en Dachau e foi ascendendo ate ser nomeado en maio de 1940 Comandante de Auschwitz-Birkenau, un novo campo de concentración, situado nunha pequena localidade do Sur de Polonia, a 60 quilómetros de Cracovia, na Alta Silesia. Cando Höss chegou a Auschwitz, todo o que había no lugar eran uns barracóns semiabandonados que databan da época austrohúngara. A poboación dos sete pobos próximos ao campo foi evacuada e cos trinta primeiros presos comezou a construción dun campo modelo. Logo fixo inscribir sobre a porta principal a lenda "Arbeit macht frei" (O traballo libera). Orixinalmente Auschwitz foi pensado como un campo de traballos forzados, unha sorte de sinistro polígono industrial. Höss traballou eficientemente e axiña houbo decenas de subcampos destinados a albergar instalacións industriais, que se beneficiaban do traballo escravo. Edificáronse grandes talleres, desecáronse zonas pantanosas e construíronse explotacións agrícolas modelo. Auschwitz-Birkenau cubría a impresionante superficie de 5.000 hectáreas. Höss, felizmente casado, con cinco fillos, cuxas idades ian dos dous aos quince anos, instalouse con toda a súa familia nunha casa situada xusto diante do campo de Auschwitz. O laborioso comandante arranxouna, fixo un xardín arredor e ampliouna ate dez habitacións, non luxosas, pero confortables. O modesto sono dun administrador de éxito. Un día Höss foi chamado por Heinrich Himmler, o seu superior inmediato quen lle comunicou que o Führer ordenara a solución final do problema xudeu. Polo tanto, encomendoulle a proposta de ideas e plans precisos para efectivizar o programa de exterminio en Auschwitz.
-"Este é un traballo duro, pero hai que facelo", díxolle Himmler. Höss, xustificaríase.
-Que fose necesario ou non ese exterminio en masa dos xudeus, a min non me correspondía poñelo en tea de xuízo, quedaba fóra das miñas atribucións. Se era oede do mesmísimo Führer, non correspondía a un nacionalsocialista de toda a vida coma min, e moito menos a un Führer das SS, poñelo en dúbida".
Auschwitz-Birkenau, converteuse no compromiso exacto entre xenocidio, traballo e pseudoinvestigación científica. Nese marco, na primavera de 1943, foi destinado a Auschwitz un mozo doutor de Baviera: Josef Mengele. Obsesionado coa bioloxía hereditaria, Mengele apostábase, elegantemente vestido, á chegada dos trens e, coa súa fusta, seleccionaba nenos para realizar todo tipo de experimentos. Na súa segunda entrevista co Dr. Goldenshon, o 9 de abril de 1946, Höss contaría con luxo de detalles a súa actividade nas tarefas de exterminio coa mesma precisión e frialdade con que o faría o xerente dun frigorífico que debe cubrir cotas de exportación. A Höss importáballe a eficiencia. En Auschwitz instalouse a primeira cámara de gas; e foi o primeiro campo en empregar o gas Zyklon B. Hoss estaba en todos os detalles; por iso a súa vida resumíase na recorrida expresión "de casa ao traballo e do traballo a casa". Incluso confesou o seu esgotamento nervioso por exceso de traballo.
-O último ano que estiven en Auschwitz traballaba demasiado. O exterminio era só unha pequena parte das miñas responsabilidades. Todas as noites soaba o teléfono para convocarme a algún sitio. A miña esposa queixábase a miúdo de que pasaba moi pouco tempo coa miña familia e de que só vivía para o traballo.
-A súa esposa coñecía os detalles do seu traballo? Pregúntalle o Dr.Goldenshon.
-Só a partir de 1942. Ao principio pareceulle cruel e terríbel. Pero eu expliqueillo do mesmo modo que Himmler mo explicara a min. Entón ficou satisfeita e non volvemos a falar do tema.
O Doutor Goldenshon pregúntalle:
-Na súa opinión, Vostede é un sádico? Höss responde con convicción:
-Non, nunca lle peguei a un interno, en todo o tempo no que fun comandante.
-Ten pesadelos algunha vez?
-Nunca.
-Lamenta algo?
-Lamentarse é cousa de nenos. Pero se hai algo que me lamento é non ter pasado máis tempo coa miña familia. En abril de 1947, Rudolf Höss, o eficiente comandante en xefe de Auschwitz-Birkenau, foi condenado á forca e executado diante da entrada do crematorio do antigo campo de exterminio.
A detallada entrevista foi publicada polo Leon Goldensohn, nas "Conversacións de Nüremberg", editado en español como "As entrevistas de Nüremberg" pola Editorial Taurus-Santillana

O galego 4049 de Mauthausen. Por Manuel Rivas


Por Manuel Rivas
.

Estamos nunha casa de Négrepelisse, na prefectura de Tarn et Garonne, no departamento Midi-Pyrinées, en Francia. É o día 6 de agosto de 1945. Un home escribe unha carta o 6 de agosto. Vai para trinta anos. Naceu en San Miguel de Mones, na aldea do concello de Petín, Ourense, o 18 de novembro de 1915. Mais no seu aspecto semella que pasou o século enteiro como unha apisoadora por riba del. Agora non. Xusto agora, non. Porque está a escribir unha carta.Para el esa carta é máis importante que calquera outra cousa que se poida escribir. Moito máis importante que unha obra mestra. Talvez, de estabelecer algunha comparanza, a carta que escribe laboriosamente, porque non está afeito a escribir, porque leva moito tempo sen poder escribir, mesmo diriamos, e non sería esaxerado, que leva moito tempo sen vivir, pois esa carta, cunha letra que avanza a ritmo de buril en táboa de madeira, tería por título axeitado o de Á procura do tempo perdido, o que puxo Marcel Proust á súa magna obra.

Iso é o que fai Albino González. O galego que vai para trinta anos que chegou a Négrepelisse e que se puxo a escribir unha carta. Este home silandeiro escoita o son da súa propia escrita como unha "voz baixa" da Historia humana. El tamén anda á procura do tempo perdido. Marcel Proust transformou a enerxía da memoria en tempo de pescuda. Lembrar sería un ir á procura. E iso transformou a narración. Xa non só se trataría de facer biografía ou reflectir o pasado. O tempo da novela xa sería un novo tempo. O presente que contén o pasado e que presinte o futuro.Albino González, ao seu xeito, utiliza a técnica de Proust. Mais ten que ser cauto na expresión do seu lembrar, malia a escribir á persoa que máis quere no mundo. Escribe a María. Escribe a Ibiza. Non desexa lectores. Abonda con María. Sería un triunfo que María o lese. Mais el sabe que vai ter máis lectores.

Lectores indesexábeis. Lectores secretos. Talvez apaixonados. Tan apaixonados que, esta tempada, en España, está de moda o andar á caza. Á caza do ser humano. Os da Censura Militar. Os da Censura Policial. Vai ti saber cantos lectores tivo a carta cando chegue a María, se é que chega a María. Porque María, pasado o tempo, é tamén un enigma.Vexamos o que escribiu Albino: "A mi inolvidable Marujita: Pienso que te extrañará mucho el recibir esta misiva mía tan tardía, pero la primera por la posibilidad.Maruja, después de cuatro años te escribo estas líneas para que sepas solamente que aún vivo, y que vivo pensando en ti, en la lucha tan larga y dura que se me ha impuesto para vivir, no he olvidado por ello, el recuerdo de un ser que me ha sido siempre querido. Yo pienso que te habrás casado o en todo lo mínimo te habrás ligado en amor a otro hombre, cosa que yo considero muy justa, si esto es así, no por ello olvido tu amistad ni tampoco debes hacerlo conmigo, y si por el contrario tu sigues aún queriéndome como yo a ti, espera poco más que días llenos de Felicidad que se aproximan para nosotros.Dime algo del que como yo fue tan informtunado, tu papá. Cuéntame algo más que yo a ti, yo tengo historia pero no para hoy, dale besos de mi parte con el amor de hijo a tu mamá, a Anita y a Lidya, y recibe inolvidable María el eterno amor de Albino"
.
En Que é a literatura?, obra do 1948 que marcou durante anos o debate verbo do compromiso do escritor, Jean-Paul Sartre preguntábase por que e para que se escribe. Sabemos que Albino escribe a unha moza chamada María. Sabemos que escribe que á procura. Soña cunha noiva para o futuro. Mais hai un anaco na carta, unha febra deste tecido, que constitúe de seu un manifesto abraiante da condición humana, o agargalar nunha frase a realidade e o desexo. Albino condensa nesa frase todos os tempos e toda a experiencia do mundo. Sen nomealo, contén o horror. Sen citala, apoia na esperanza. Non hai ningunha grandilocuencia, ningunha retórica, ningún ornamento, mais a construción é perfecta, imposíbel de mellorar:"Escribo estas líneas para que sepas solamente que aún vivo, y que vivo pensando en ti".Son dezaseis verbas. Eis o porqué e o para quen. Se toda a linguaxe caera no Sil e as aureanas e aureáns que bateaban as augas co cunco para topar as pebidas de ouro tivesen que decantar unhas verbas, que máis quererían? Estou vivo e penso ti. Va que presta lanzar un xubiloso xuramento! Mais Albino escribe esta bomba informativa en voz baixa. Iso é o que leva facendo a humanidade perseguida dende sempre cando transmite a información esencial. Esa é a verdadeira Ars Poetica equivalente a como a define Archibald MacLeish:"A poem should not meanBut be"Dito ao xeito de Albino: O poema está vivo.Quen era Albino González?Un galego que loitara no Exército republicano, ferido de gravidade en Irún, e que se repuxera en Valencia, onde coñeceu a María Gómez cando ela tiña 16 anos. El volveu á fronte a loitar, pasou a Francia cando a caída de Cataluña e foi internado no penoso campo de Argelés. Cando a invasión nazi, Albino alistouse no exército francés. Detido polos alemáns, sufriu o destino de miles de españois republicanos. Os que levaban como marca o triángulo azul nos campos de exterminio nazis. Cando Franco e Serrano Súñer foron consultados polos xefes nazis sobre o destino destes españois recibiron a resposta de que os "verdadeiros" españois estaba en España. É dicir, estes dous grandes criminais non tiñan mortos dabondo no propio país senón que converteron en apátridas a miles de SP, os spaniards, heroicos españois nas gadoupas nazis. Albino foi levado ao inferno de Mauthausen co número de matrícula 4049. No mesmo convoi ía o ourensán Juan González del Valle, con número de matrícula 4054, logo deportado a Gusen, coa matrícula 9035, onde morrería gaseado o 26 de novembro de 1941. Albino sobreviviu en Mauthausen. Cando foi liberado o 5 de maio de 1945, día en que entrou o Exército dos Estados Unidos, era un dos responsábeis clandestinos da resistencia naquel inferno.Algo sabiamos del polo que contara o fillo, Xesús González Gómez, sabio certamente en Ars Poetica e na historia das "voces baixas" da humanidade. Autor, entre outras pezas imprescindíbeis nunha biblioteca xerminal, de A lingua secreta. Entre nós, XGG. O valor dunha clave para protexerse do virus da amnesia. É el, XGG, quen agora publica no mesmo volume Cartas da noiva, de Albino González González, e El argonauta, de Juan Gómez Ripoll Campos (Edicions Documenta Balear). El argonauta é o comezo dunha novela truncada polo crime. O seu autor era Juan Gómez, o pai de María, pasado polas armas no cárcere provincial de Palma en 1942. Cando coñece a noticia da morte de Juan Gómez, Albino escribe a María: "Otros muchos conmigo juran ser vuestros padres, o relevar sus funciones, juran defenderos, juran sosteneros, y no hace falta jurar puesto que tú bien sabes quienes somos nosotros". Quen eran? As "voces baixas".
Tirado do xornal El País 21.11.08